| Pietre di Venezia | ..:Torna indietro:.. |
| Ghe gavé mai pensà, Venessiani... | |
| di Umberto Sartori - inviato il 09/05/2007 | |
 La nostra mare aqua, mare prima ancora che Venessia stessa, che digo, prima ancora che nostra mare natural, sta Mare Aqua, che par secoi e secoi ga sostignio la nostra aventura, ne se ga voltà contro. La piova invesse che disetarne nialtri bestie e piante, ne desfa tute e nostre bee piere. El mar no speta più el dueo dee nostre prove al largo; el ne vien drento casa, drio i litorai, e par che el voja indrio la Laguna che el ne gaveva lassà in concession. Cossa ghe sarà de diverso in sta aqua, da quea che ne voeva ben? No sarà che una volta ne l'aqua andava e benedission dei preti e e speranse de tuta la gente, e invesse adesso ne l'aqua pompemo solo che solfo del demonio? Mi, che pur saria de formassion atea positivista e donca 'sai scetico, a missiar reigion e poitica, me vien proprio da risponder de sì a sta domanda. Parché positivista fin che voé, ma miga cretin. La reigion sé afar del Popolo, come la poitica, ansi più antica e influente. Quasi tuti i insegnamenti morai che ga fato granda sta cità sé ancuo disatesi, mistificai e spesso anca dilegiai in publico. E no penso afato de farghe un torto al Sincretismo venessian disendo che quei valori gera stai enunciai nea Reigion cristiana e in so nome propugnai e difesi. E alora vedemo come che par forsa ne toca sposar la Reigion a la Poitica, atraverso el medium dea moral... Chea fasie batua 'sai in voga: "No ghe sé più reigion!" dita co na strucada de ocio e un sorisin, pararia che la sia drio costarne la vita, come cità, e par queo che riguarda l'orese Cararo, anca come persona. A Dante la ghe sé andada mejo, ma Dante sé special. |
|
© veniceXplorer.net, 2001 - 2005 | |