La fameja de i çievoli la xe la più granda che ghe sia.
Intanto no se gà da confondar i çievoli da la boseghe o da i branzini, che xe tuta altra roba.
De quela fameja fa parte i causteli, i lotragani, i botoli, i verzelate, i baicoli (i ghe someja al branzin), i batauri, i varioli.
Se li distingue dal color de la pele su la schiena e su la pansa,, dal muso più o manco schissà, da la coa, da le s-ciame più o manco compate, da el color del testa.
La morte del çievolo, a parte el lotragan che se pol anca frizerlo, la xe su la graela.
Ma no la graela de adesso che la xe sora el gaz, ma la graela de carbonela.
E adesso ve conto come che mi i fassevo co jero in bottega.
So ben che calchedun saltarà fora a contarme che lu li fa in altro modo: ma a mi no me interessa un .. tubo, parchè digo come che MI li fassevo e come che i me clienti i tornava contenti e i me lassava anca dei bei bessi de mancia.
Donca, prima de tuto bisogna saverli crompar. Vardar prima de tuto se i xe da bon o i ga la coccia. Vardarli su i oci e soto le branche, po’ bisogna strucarghe la pansa par vedar se i xe da bon. Se dal buso del cu.lo che i ga soto la pansa, a strucandondoghela, vine fora el pacio no i xe da bon, se invessi no vien fora gnente i xe da bon.
Me dimandarè percossa e par come. E mi ve lo diso. El mejo bocon del çievolo, par un venexian, el xe el boton, ossia el buelo e el stomego col figadin che trà a l’amaro in boca de primo achito, ma che la lassa dolse dopo.
Gavè da saver che el xe da bon parchè nol ga gnancora magnà gnente. E sto qua xe par el motivo che i animali i sa magnar mejo de noantri! Infati co l’aqua xe de dozana nessun pesse magna, parchè la dozana porta fora tuto el sporchesso che ghe xe in ziro par i canali e par la laguna. Alora da quando che ghe xe el colmo de marea a da quando che l’aqua va in balansa co la colma tuti i pessi se ferma de magnar, e i torna a magnar co l’aqua la xe de novo in balansa e la scominsia a cressar parchè la xe più neta. Ciameli mone….
Ohh, ve disevo come che se li cusina.
Mi go ancora un de quei vasi de teracota che ‘na volta vendeva i carboneri e lo tegno ancora come ‘na reliquia: el sarà anca tuto taconà, co le regete de fero par tegnirlo in sesto, ma el funsiona ancora, e po’ el xe quelo che avevo in botega e che me ga fato ciapar tanti schei.
Adesso par dopararlo me toca spetar che queli che stà sora de mi i vada via par no spussolentarli col parfumo, e me meto su la piera del balcon a rostirme el me bravo çievolame!
Alora co la carbonella la ze impissada e la graela a creme larghete – ma no tanto – la xe pronta, se ghe mete sora i çievoli.
NO SE GA’ DA LAVARLI E NO SE GA’ DA SCAMARLI!!!!!
Se i li mete cussì: come che i li stà. Co tuto el so pien e co tute le so s-ciame. Le s-ciame i le perde cusinandose, e cussì el çievolo no ciapa i disegni de la graela e nol se brusa.
Pena che el xe coto da ‘na parte (el se staca da solo alsandolo con ‘na ongia), se lo volta e se ghe mete sora un spissego de sal. Col xe coto anca da stantra parte, se ghe mete anca là un spissego de sal.
A parte mi go parecià ‘na scueleta co dentro ajo e parsemolo tritai, ojo sal e pavare: gnente limon, e ghe lo meto sora el pesse.
Ma no la xe finìa!
A caxa se anca pol scominisar a magnarlo, ma mi in bottega – co lo servivo in tola – jera là che me ciapavo un fanco!
Alora in t’un piato de portada ghe metevo un o do çievoli, secondo la misura. A parte tegnivo deo fete de polenta brustolada bela calda e coverta co un tovajol.
Me ricordo che ghe jera l’ avocato Bragadin e el prof. Zagnoni che i voeva che prima de tuto ghe servisse al boton del çievolo… se el cliente no lo voleva: mejo par mi, parchè me lo metavo da parte e me lo cucavo…
Alora ghe spinavo ben ben el çievolo (che a calchedun ghe disevo che el jera branzin… cussì che ciavavo mejo i schei…) e ghe lo puzavo sora la polenta brustolada, col el scujer e co el piron ghe struccavo ben ben la testa al pesse, ghe metavo sora un limon strucà, pevare sal e ojo de oliva.
Missiavo ben ben tuto quanto: testa spini, e la salsa, sbandavo el piato e el tocio che colava zoso lo rancuravo col scujer e lo metavo sora el pesse, nantra strucada de testa e anca chel tocio sora el pesse.
Ogni tanto ghe fassevo el scherso de metarghe davanti i spini e portarme via el pesse… ma i me ciamava sempre indrìo par dirme che me sbagliavo…
Lori rideva, i jera contenti, i magnava ben, i pagava mejo e i me lassava de le bele mancie.
E dopo me magnavo el boton che loro no aveva vossudo!