September 2017
1 2 3 4 5 6
7 8 9 10 11 12
13 14 15 16 17 18
19 20 21 22 23 24
25 26 27 28 29 30
31      

Testo italiano English Text

Barche Venessiane e Lagunari

INDICE
Venessia ObServer: Efeti del Trafico de Navi Grande sul Porto Storico de Venessia
Forcoe e Remi Forcola Forcola Forcola Forcola Forcola
Forcola Forcola Forcola Forcola Forcola Forcola

Forcoe

E forcoe sé i scalmi par la voga veneta, de forma molto diversa in base al tipo de barca dove che se e usa e ala posission dove che e và su la barca.
Massime e se divide in forcoe da pope e forcoe da prova.

La forcola da pope sé complicada, e pol aver anca do "morsi" pal remo, queo in basso par la voga da soi e queo in alto par la voga co più vogadori opur quando che el popier gà da montar su la "nerva".
La forma piena de curve e la ibertà del remo de scampar fora da la forcola serve ala manovra: defati el remo agisse su la forcola no solamente nei morsi, ma in tante altre posission, permetendo par esempio de vogar a l´indrio e de girar la barca sul so asse.
Nea forcola da pope de la gondola (foto a destra) se conta ben nove posission remo/forcola.

E forcole da prova sé più semplici, co solo un morso pal remo, ma mantien na gran varietà de forme secondo par che barca che e sé fate.

Esiste n´altra classificassion dee forcoe vardando l´uso che se ghe ne fà:
Uso da lavoro - de soito e sé più drite e semplici par ridur l´ingombro;
Uso da spassiso - sinuose e spesso decorae a intajo e doradura (velae);
Uso in regata disegnae su misura da ogni regatante e sensa "tapa" par consentir posission personaisae sul "nogaro" usando dee penoe.

E parti essensiai de la forcola sé:

  • testa
  • morso
  • naselo de sora
  • naselo de soto
  • recia
  • sanca e comio
  • tapa
  • sata

Na bona forcola, vien ricavada spacando un tronco de noghera co cugni in maniera da no romper la vena del legno, el toco ricavà co sto sistema, come queo usà par i remi in fagio, se ciama stela.

Remi

El remo par la voga veneta sé ricavà da na stela de fagio, cioè un tronco giovine opur uno spacà par longo co cugni (sopratuto ancuo, che el ramin gà sopiantà el fagio), par garantir la massima easticità e robustessa co un diametro minimo. Par rimediar la larghessa de la pala, la vien finia co i do difarenti "cortei" sui fianchi, fati de egno duro.

Anca nel remo se distingue diverse parti:

  • el giron
  • - la parte tonda che se ciapa in man;
  • l´entrar - la parte che agisse su la forcola;
  • el copo - la parte co la session traversa asimetrica fra l´entrar e la pala;
  • la pala
  • el corteo longo - sul lato superior dea pala;
  • el corteo curto - sul lato inferior dea pala, el primo a entrar in aqua;
  • el soraosso - tasseo che pol trovarse inserio ne l´entrar par riparar remi fruai dala forcola o par farli più eastici.

El "giron" tondo se sviupa nea pala co inee dolsi, senza discontinuità.
La session traversa del copo se presenta bombada a spigolo nea facia superior e bombada a arco in quea inferior: in sta maniera la metà inferior del remo sé più pesante de quea superior, favorendo l´entrar ("premer") e el tirar fora (staìr) el remo da l´aqua specifico dea voga veneta.

La longhessa del remo veneto cambia, secondo la barca, da sirca do metri e meso a oltre i sinque. I remi usai da pope sé un poco diversi da quei de prova, più curti e col "copo" più simetrico.

TOP - INDICE